خبر جديد و حصري علي بالعربي (شمهورش في مصر

ازيكم يا عرباوية ........عاملين ايه ؟؟؟؟؟يا رب دايما تكونوا بالصحة و السلامة عايزين النهارده نتناقش في موضوع منتشر كتير اوي في مصر وكتير مننا بيصدقه[color=blue][color:2f4a="#ff0000"]عايزين نعرف احنا ليه بنصدق الدجل والشعوذة ده اللي هنعرفه من مناقشاتنا يا كل شباب و بنات بالعربيحجرة مغلقة.. الإضاءة فيها خافتة.. في نهايتها وعلى كنبة مستطيلة يجلس الشيخ "شمهورش" رجل ضخم الجثة عريض المنكبين -يعني عضلات جامدة ولا مؤاخذة-.. تدخل أنت ثم ينغلق الباب من خلفك "طررراخ!"..

تشعر بكثير من الخوف وأنت في هذا المكان الذي يبدو أنه صالح لمشهد في فيلم رعب.. تتنحنح "كح كح".. يلتفت نحوك الشيخ "شمهورش" -اللي هو عريض المنكبين!- ثم يرفع رأسه وهو يقول لك بصوت عميق هادئ:
- أهلا وسهلا.. اتفضل اجلس يا سيد!

يلعب الفأر في عبك وأنت تسأل نفسك:
- "سيد".. عرف منين إن اسمي "سيد"؟

يكمل "شمهورش":
- وكيف الوالد "أبو سيد" والوالدة "أم سيد"؟!

يا نهار أسود وكمان عارف اسم والدي ووالدتي! ده أكيد مكشوف عنه الحجاب!
هاه.. بتشكي من إيه.. خوف.. ولا ربط.. ولا نحس.. ولا جن مصاحبك!
شوف يا مولانا.. أصل الحكاية إن...

قبل ما نكمل دلوقت ميعادنا مع مجموعة من الأرقام المفزعة..
فاصل ثم نواصل!



"300 ألف شخص في مصر يدعون أن لديهم القدرة على علاج الأمراض من خلال الاستعانة بالجان والأرواح"

"دراسة لمركز البحوث الجنائية بالقاهرة"

***



"المصريون ينفقون نحو 10 مليار جنيها سنويا على أعمال الدجل والشعوذة"
"نفس الدراسة السابقة"

***



"50% من النساء المصريات يعتقدن بقدرة الدجالين على علاج مشاكلهم"
"نفس الدراسة السابقة"

***


"63% من المصريين يؤمنون بالخرافات والخزعبلات 11% منهم سياسيون ومثقفون ورياضيون"
"دراسة للمركز القومي للبحوث النفسية بالقاهرة"

***


عدنا!
أهلا بكم!

دلوقت واضح جدا الكارثة اللي احنا عايشين فيها..

ولاّ إنت عندك وصف تاني غير الكارثة للأرقام اللي فوق دي واللي تخوف أسد الغابة ذات نفسه !

لاحظ إن مصر اللي هي بلد من العالم الثالث –بعد المائة تقريبا!- واللي نسبة الناس اللي عايشة تحت خط الفقر تترواح فيها ما بين "22% حسب أرقام الحكومة و44% حسب أرقام المؤسسات المدنية" بيصرفوا 10 مليار دولار على أعمال الدجل والشعوذة..

خدت بالك إن 63% من المصريين –يعني تقريبا 45 مليون بني آدم– شايفين إن أعمال السحر دي صح الصح وإن الرقم المهول ده عُشره تقريبا ناس حلوة متنورة ومتعلمة ويمكن كمان نجوم بيطلعوا في السينما والتليفزيون يتحدثون عن "دور المثقف في تطوير المجتمع ومحاربة الخرافات"!



طيب ما التفسير؟

علم النفس له رأي مهم جدا.. بخصوص انتشار ظاهرة اللجوء إلى المشعوذين والدجالين والإيمان المطلق بقدرتهم على علاج كل المشاكل وفك كل المصائب..

يقول هذا الرأي النفساوي:
"النفس البشرية قلقة بطبيعتها وتميل دوما إلى أن تتوجه نحو الاستقرار.. ولأن حياة الإنسان لا تخلو عادة من المشاكل والإخفاقات فإن البعض يستخدم أسلوبا دفاعيا يعرف في علم النفس بـ(عدم الفعل undoing).."


خلص الكلام.. لأ لسه.. إيه بقى فعل "عدم الفعل" ده؟

هو أن تقوم أنت بالسعي نحو أشياء تداري عجزك وتلقي كل المسئولية في الفشل أو الإخفاق على أشياء غيبية غير ملموسة وبدلا من العمل والجد والاجتهاد فإن الحل والنجاح والصلاح والفلاح يكمن في قراءة الفنجان أو الحجاب أو الاستحمام بماء لعب فيه الاستغماية ذكر ضفدع تايواني مع أنثى عنكبوت كاميرونية!

لو دققت في البحث فعلا هتلاقي إن أغلب المشاكل اللي بتدفع المصريين للذهاب إلى الشيخ "شمهورش" ورفاقه هي مشاكل اجتماعية سببها اقتصادي في الأغلب سواء كانت المشاكل دي خناقات متكررة بين الأزواج أو تأخر في الزواج أو في الحمل أو مشاكل في العمل أو مع الأصدقاء..

والمنطق بيقول.. إنه من المستحيل أن يكون الجن والأشباح وراء هذه المشاكل التي نعاني منها؛ لأن الجن وراهم شغل تاني مش احنا شغلتهم وبس..

والسؤال المنطقي.. ليه الجن دايما بيحب يتجوز واحدة مصرية فيلبسها أو يقرف عيشة واحد مصري أو عربي فيربطه ومايخلفش.. اشمعنى احنا يعني؟

الشيخ "محمد الغزالي" رحمه الله له رأي مهم في الموضوع ده.. وتساءل:
"لماذا تسكن الجن أجسادنا ولا تسكن أجساد الغرب وغيرهم"؟.

وعندما جاءه أحدهم يشتكي إليه من أن به مسًا من الجن قال له الشيخ "الغزالي":
"ألا تستحيي من أن تكون هكذا طويلا وعريضا وتقول الجن يسيطر علي"؟!

طبعا نحن هنا لا ننكر.. وجود الجن أو وسوسة الشيطان لأن كل هذا مذكور في القرآن الكريم...

لكننا ننكر ونستنكر ونشجب وندين.. -على طريقة الدول العربية في إدانة إسرائيل!- انغماس نسبة كبيرة من المصريين ومعهم نسبة كبيرة من العرب في وهم الشعوذة والالتجاء للشيخ "شمهورش" ورفاقه لحل كل المشكلات المستعصية..

ده اسمه "هجص" ولا مؤاخذة!

ولا إنتم رأيكم إيه..؟

حد فيكم جرب إنه يروح لدجال أو واحد من اللي بيقول على نفسه إنه شيخ علشان يتعالج من الجن؟

واحدة فيكم أهلها ضغطوا عليها علشان تروح للشيخ "شمهورش" عشان يخليها تتجوز بعد ما -يا عيني- اتفسخت خطوبتها كذا مرة؟



اتكلم وماتخافش..
خلينا نكشف الحجاب عن الشيخ "شمهورش" ورفاقه!

اتكلم بصراحة عايزين نعالج المشكلة دي و نقضي عليها تماما من جدورها كمان