ست الحسن والجمال والشاطر حسن

نادت عليٌ الجدة ... تعال أحكيلك حدوتة ست الحسن والجمال .. وقعدت الجدة واتربعت وجريت عليها وقعدت في حجرها . أخدتني الجدة في حضنها وقالت بصوتها الحنون صلي علي النبي رديت عليه ألف صلاة وسلام .....................

كنت بسمع الحدوتة مش بوداني لكن بكل مشاعر حب جوايا ، وأدوب في هواكي من جمال وصفك وجمال أخلاقك وتدينك وإيمانك ...ولما قالت الجدة عن الشاطر حسن قلتلها أنا الشاطر حسن ياجدة انا الشاطر حسن ..ضحكت الجدة بحنان وقالتلي طبعا انت الشاطر حسن وهتفضل الشاطر حسن اللي هيدافع عن ست الحس والجمال لما الغولة هتخطفها !!!.
وسعت عينيا من المفاجأة وسألتها بلهفة هي الغولة هتخطفها ليه؟ قالت الجدة مفيش صبية في جمالها الإ لما كان ليها حساد كتير نفسهم متقملهاش قومة!!!!.

وتمر الأيام والشهور والسنين كبرت وأصبحت شاب فتي، في كل يوم يمر بعمري كان حبك في قلبي بيكبر وعمره في يوم مـــا فـــتر.
كبرت أنا وفضلتي إنت زي ما إنت مش بتكبري في الشكل لكن العمر بيعطيكي الشباب والصبىٌ وتبارك الله فيما خلق.

حسيت إني الشاطر حسن لما الغولة خطفتك وخبتك في كهفها المهجور عشان تداري جمالك وتطفي ضياكي عن الوجودوتحكم عليكي بالموت .
طلعت من قيد الحدوتة وكنت انا الشاطر حسن عشان اصارع الغولة الملعونة وانقذك منها وأرجعك لبيتك ومطرحك وأنصرك بفضل الواحد الاحد علي كل العدا وأروي عروقك بدمي وأمسح عنك غبار الأسي .

انت دايما ياحببتي ست الحسن والجمال وأنا الشاطر حسن اللي من طفولته انت ساكنة قلبة واُسرة روحه ومهجته.

عايز ارسم صورتك علي صدري وأنقش اسمك علي زندي عشان كل الناس تعرف إن انا فتاكي الشاطر حسن . راسم الوشم لما شاف صورتك قال تبارك الله فيما خلق .... ولما عرف اسمك قال اسم علي مسمى . قعدت قدامه وهو بيرسم صورتك علي صدري وافتكرت أد ايه انت جميلة جمال يثير غيرة وحساد ىكل البشر.
الشعر طويل كاليل صيف يهفهف فوق الجبين مع اي لمسة هوا..
العنين بلون الخضرة يسبي قلوب كل البشر.
الرموش سهام طويلة بتغزو القلوب بدون استئذان مكحلة رباني ونظرتها تأسر أجدعها فتى.
الفم دايما مبتسم حتي وانت ياحببتي بتتألمي عمرك ما دفنتي ابتسامتك اللي بتعطيني الامل في بكرة وإنه حتما هيجي ومعاه ألف باقة أمل .
وبشرتك من الشمس قمحية يا أحلي صبية .
إنت مرسومة علي صدري وسام وجوا القلب مزروعة من زمان

أما اسمك..... اٌه ..اٌه ..لوحده كل حرف فيه له ألف حكاية لما أسمعه يزيد عشقي ليكي جوايا ولما أقرأه بيزلزل كياني وأبقي عايز اجري عليكي وأحضنك.

الميم :- مصطفية ومحمية برعاية الواحد الاحد.
الصاد :- صدر أم حنونة يضم كل البشر وصابرة وصامدة في وجوه كل العدا.
الراء :- راية مرفوعة عاليا تعشٌق الحرية وترفرف حرة في سما ربنا .

مصـــــــــــــــــــــــــــــــــــــــر يا ســــــــــــــت الحســــــــــــــــن والجمـــــــــــــــــــــــــــــال
وبتسألوني بتحب مصر ؟
أجاوب وأقول معرفش أحب غيرها . و لآ أقدر أحس بغيرها. هي دي ست الحسن والجمال وأنا في الحدوتة الشاطر حسن .

لما تيجو تحكوا الحدوتة متقدروش تذكروا الشاطر حسن الإ لما تقولوا قبله ست الحسن والجمال.

يا مصر ياحرة يا أبية عمري في يوم ما أكرهك.... ممكن أزعل منك لكن ابدا ابدا ما أكرهك ولما يحكم علي الزمن بفراقك بأخذك معايا جوايا مزروعة في قلبي ومحفورة علي صدري ...يعني برضه مش ببعد عنك ...
ولما برجعلك بيكون حبك زرع ألف زهرة شوق جوايا. وارجع ارتمي في حضنك و أبوس تراب رجليكي وأسجد علي أرضك الطهرة وأصلي لله الواحد الأحد . وأصرخ بأعلي صوتي بحبك ياست الحسن والجمال بحبــــــــــــــــــــــــــــــــــك يا مصــــــــــــــــــــــــــــــــــــر.

مشكور ياغالي على الموضوع الحلو تسلم اديك

تحيااااااااتي

مشكوررررررررررررررررر على المرور
وانتظر منى الجديد ان شاء الله